विशाल चौतारी समाचार
काठमाडौं, ८ फागुन । देशविदेशमा रहेको नेपालीले अनिसलाई बचाउने अभियानमा सहभागी हुने काम दिनदिनै बढ्दैछ । राईलाई बचाउनका लागि अहिले विभिन्न कलाकारहरुले पनि सहयोग थप गर्दै छन् । यसै क्रममा अनिस राईलाई  बचाउन प्रथम मिस राई युमा राईले करिव ६४ हजार सहयोग अनिसका श्रीमती रविता राईलाई आफ्नै हातबाट हस्तान्तरण गरेकी छन् ।
वैदेशिक रोजगारको शिलशिलामा ०६८ सालमा दुबईको अवुधाबी पुगेका अनिस राईलाई ज्यान मारेको  मुद्दाको अभियोगमा  माथिल्लो अदालतले मृत्यृदण्ड सजाय सुनाएको  थियो । उनलाई बचाउन विश्वभरबाट आर्थिक सहयोग संकलन कार्य तीव्र हुदैछ ।
सहयोग हस्तान्तरण गर्ने कार्यक्रममा प्रथम मिस राई युमाले भनिन्, ‘एउटा नेपालीले अर्को निर्दोष नेपाली बचाउनु पर्छ, यो मेरो सामाजिक उत्तरदायित्व हो ।’ उनले अगाडि थपिन्, ‘सहयोग रकम मैले घरैबाट सुरु गरेपछि विदेशबाट समेत आर्थिक सहयोग आएको र त्यसलाई जम्मा गरी बुझाएको हो ।’ युके, हङकङलगायत देशबाट उनले उक्त रकम जम्मा गरेकी पनि उनले बताइन् । युकेबाट संगीता राईको पहलमा र आफ्नो नेपालबाट गरिएको पहलबाट सो रकम दिन सफल रहेको मिस राई युमाले बताईन् । मिस राई युमाले आफ्नै पहलमा ५० जना भन्दा बढी मानिसहरुबाट १०० रुपैया सम्मको रकम उठाएर सो रकम संकलन गरेकी हुन् । मिस युमाले सौर्यलाई बताउदै एउटा नेपालीलाई अर्को देशले समस्या पार्छ भने, हामि सबैले एकसाथ उठ्नुपर्ने बताइन् । त्यसो त बेलायतमा अहिले विभिन्न क्षेत्रबाट अनिस बचाउ अभियान चालिएको बताइएको छ ।