विशाल चौतारी समाचार 
काठमाडौं, ७ पुस । ‘बितेका पल’ अभिनेत्री केकी अधिकारी पछिल्लो समयमा जति चलचित्रहरुमा अभिनय गर्नमा व्यास्त देखिन्छिन्, त्यति नै मात्रामा उनी सामाजिक कामहरुमापनि देखिन थालेकी छिन् । यस्तै क्रममा अभिनेत्री शनिबार केकी राजधानीस्थित नयाँबजारमा एचआईभी संक्रमित बालबालिकासँग देखिइन् । अभिनेत्री केकीले सफलता एचआइभी शिक्षा सदनमा आश्रित १७ जना संक्रमित बालबालिकालाई आफू अभिनीत चलचित्र ‘वितेका पल’ देखाउने प्रतिवद्धतासमेत जनाइन् ।
मानवता संरक्षण मञ्चको आयोजनामा ‘एचआईभी संक्रमित राहत कोष’ स्थापनाको उद्घाटन कार्यक्रममा प्रमुख अतिथि बनेर पुगेकी अभिनेत्री केकीले प्रदर्शनको पहिलो दिन बालबालिकासँगै ‘वितेका पल’ हेर्ने बाचा गरे । आयोजक मानवता संरक्षण मञ्चले उपलब्ध गराएको जाडोका लताकपडासमेत अभिनेत्री केकीले बालबालिकाहरुलाई बाँडिन् । निकै समय तिनै बालबालिकाहरुसंग गफिईन्पनि । चलचित्रकी अभिनेत्रीसँग तस्बिर खिचाउन पाउँदा संक्रमित बालबालिकाहरु हर्सित देखिन्थे । साथसाथमा अभिनेत्री केकीले ‘वितेका पल’ संगै हेर्ने भनेपछि ति बालबालिकाहरु पुस २६ को पर्खाईमा रहेका छन् । सुरज सुब्बा नाल्बो निर्देशित सो चलचित्र २६ पुसदेखि एकसाथ देशभरबाट प्रदर्शनमा आउँदैछ ।
मानवता संरक्षण मञ्चका अध्यक्ष तथा गायक हेमन्त मोत्तानले एचआईभी संक्रमित बालबालिकाको शिक्षा र स्वास्थ्यका लागि कोष स्थापना गरेको बताए । कीतिपुरस्थित भत्केको पाटीमा रहेको सफलता एचआईभी शिक्षा सदनमा यी १७ संक्रमित बालबालिकाहरु अध्ययनरत रहेका छन् । उनीहरुलाई राजकुमार पुनले संरक्षण दिँदै आएका छन् । दाङ र डोल्पाबाट ल्याइएका ती संक्रमित बालबालिका अधिकांसका बाबुआमा छैनन् । शिक्षा सदनका अध्यक्ष पुनका अनुसार सबै बालबालिका संक्रमित बाबुआमाबाट जन्मिएका हुन् । उनीहरुका बाबुआमाले संक्रमणबाटै ज्यान गुमाइसकेका छन् ।
(फोटो फिचर सहित)



 watch this bisal chautari youtube video